Thursday, April 2, 2015

पंचांगाचे आगमन आणि आनंदसोहळा....

॥ ॐ शं शनैश्चराय नम:॥

नमस्कार,

दरवर्षीप्रमाणे मी यावर्षीही ब्लॉगवरून प्रत्येक हिंदु  घरात पंचांग असण्याची गरज प्रतिपादन केली होती. वैदिक कालगणनेइतकी अचूक कालगणना जगात कुठलीही नाही. तसेच दैनंदिन जीवनातील आवश्यक आणि जिव्हाळ्याच्या गोष्टींची अचूक, सखोल माहिती देणारा पंचांगासारखा दुसरा खजिना नाही.

माझ्या आवाहनाला प्रतिसाद देऊन दरवर्षी प्रमाणे यावर्षीही काहीजण, जे पूर्वी पंचांग आणत नव्हते त्यांनी  यावर्षी घरात पंचांग आणून, पाडव्याला त्याची पूजा करून, त्या पवित्र ग्रथांला घरात सन्मानाचे स्थान दिले आहे, याचा मला अतीव आनंद आहे. 

त्या सर्वांना मनापासून धन्यवाद. देव त्यांचं भलं करो. 

घराला घरपणं हवं.  केवळ उंची फर्निचर आणि वातानुकूलित शयनगृह म्हणजे घर नव्हे. ते हॉटेलातही असतं.

घर म्हणजे देव्हार्‍यातील निरांजनाचा प्रकाश, घर म्हणजे पंचांगानुसार पवित्र व्रतवैकल्याचे आचरण, घर म्हणजे ज्ञानेश्वरीच्या ओव्यांची गुणगुण, घर म्हणजे मंत्रांच्या ध्वनीच्या स्पंदनांची गुंफण, घर म्हणजे दिवेलागणीला म्हटले जाणारे " शांताकारं भुजगशयनम्‌", घर म्हणजे अग्निहोत्रासाठी केलेल्या होमाचा होणारा धूर.

या माझ्या घराबद्दलच्या काही संकल्पना आहेत. असो.

आपला,
(कुटुंबवत्सल) धोंडोपंत 

॥ श्री साईनाथाय नम:॥

चंद्रग्रहणासंबंधी.....

॥ ॐ शं शनैश्चराय नम:॥

नमस्कार,

शनिवार दिनांक ०४ एप्रिल २०१५ रोजीच्या चंद्रग्रहणासंबंधी......

दिनांक ०४ एप्रिल रोजी खग्रास चंद्रग्रहण असून ते ग्रस्तोदित आहे. 

ग्रहणाचा स्पर्श दुपारी ०३ वाजून ४५ मिनिटांनी आहे.  सायंकाळी ०५.३० च्या सुमारास ग्रहणमध्य असून सायंकाळी ०७.१५ वाजता ग्रहणमोक्ष आहे. 

दिनांक ४ एप्रिल रोजी सूर्योदयापासून ते ग्रहणमोक्षापर्यंत वेध पाळावेत असे सांगितले आहे. 

आता यात सर्वात महत्वाचा मुद्दा म्हणजे दिवसभर उपाशी राहणं हे बहुतेकांना अशक्य आहे. तेव्हा आपल्याला जसं जमेल तसे वेधादि नियम पाळावेत. 

कुठल्याही वेधादि नियमातून, गर्भवती स्त्रिया, लहान / अंगावर पिणारी मुले, आजारी आणि वृद्ध व्यक्तिंना वगळले जाते. या लोकांनी वेधादी नियम पाळू नयेत. 

इतरांनीही आपल्याला झेपताय तिथपत पाळावेत. अतिरेकाने काही करायला जाऊ नये, असं आपलं माझं मत आहे. 

ग्रहण सुरू होताच स्नान करावे. ग्रहणकालात पूजा, तर्पण, जप, हवन इत्यादि कर्मे करावीत. ग्रहणमोक्ष झाल्यावर स्नान करून यथोचित दानधर्म स्वेच्छेनुसार करावा.  " दे दान... सुटले गिराण" करत येणार्‍या गरीबाला दहा रुपये काढून दिले तर काही फरक पडत नाही. 

ज्या कुणी मंत्रदीक्षा घेतली असेल, त्यांनी त्या मंत्राचे पुरश्चरण या काळात करावे. माझ्या दृष्टीने तो सर्वात महत्वाचा भाग आहे. असो.

आपला,
(नेमस्त) धोंडोपंत 

॥ श्री साईनाथाय नम:॥


Tuesday, March 17, 2015

नववर्षाचे पंचांग

 ॥ श्री स्वामी समर्थ॥

नमस्कार, 

नववर्ष सुरू होताय. या वर्षीपासून प्रत्येकाने आवर्जून पंचांग घरात ठेवा. पंचांग हा अत्यंत उपयुक्त माहितीचा खजिना आहे. तुम्ही ज्या गावात राहता, त्याच्या किंवा त्याजवळच्या गावाच्या अक्षांश रेखांशांवर आधारित पंचांग घ्या. 

तुमच्या घरातले जे बुज़ुर्ग लोक असतील त्यांच्याकडून पंचांग कसं बघायचं, याचं बेसिक शिकून घ्या. प्रचंड फायदा होईल. आपल्या गरजेपुरतं पंचांग पाहता येणं, ही एकदम सोपी गोष्ट आहे. 

कुठल्या नक्षत्रांवर आपण आपली कामं करायची आणि कुठल्यावर कशापासून दूर रहायचं, एवढं कळलं तरी जन्माचं कल्याण होईल. आणि हे एवढं कळण्यासाठी काही फार मोठं ज्योतिषशास्त्र शिकायला नको. फार टेक्निकल गोष्टींच्यात जायची सर्वसाधारण माणसाला काही गरज नाही.

त्यामुळे, ज्या घरात पंचांग आणत नसतील त्यांनी आज, उद्या, परवा पंचांग घेऊन या. पाडव्याच्या दिवशी त्याची पूजा करा आणि त्याच्याशी मैत्री करा. 

आपला,
(गणकभास्कर) धोंडोपंत

॥ श्री साई समर्थ॥

Saturday, February 21, 2015

भाग्य चालते कर्मपदाने...............

॥ ॐ नम: शिवाय॥

नमस्कार,

आज बरेच दिवसांनी कुंडलीबद्दलचा लेख लिहितोय. गेल्या वेळेस नमूद केल्याप्रमाणे एका कष्टाळू माणसाची कुंडली आज तुमच्यासमोर ठेवतोय, जो वयाच्या ६६ व्या वर्षीही नोकरी- धंदा करत आहे.

या गृहस्थांचा जन्म कर्नाटकातील उडीपी या तालुक्यात १९४९ साली झाला. घरची अत्यंत गरीबी असल्यामुळे वयाच्या ९ व्या वर्षापासून, गावातल्याच त्यांच्या घराजवळील एका हॉटेलात, टेबलं पुसण्याची नोकरी पत्करावी लागली. नोकरी आणि शाळा हे दोन्ही साधत मॅट्रीकपर्यंतच शिक्षण पूर्ण केलं. पुढे शिकायची इच्छा असूनही शिक्षण घेता आलं नाही. मग कर्नाटकातून मुंबईत स्थलांतर करुन, एका नातेवाईकाकडे पेईंग गेस्ट म्हणून राहिले. त्या काळात एका बहुराष्ट्रीय औषध कंपनीत त्यांना नोकरी मिळाली. हुद्दा होता " शिपाई". शिपायाचे काम करत असतांना, त्यांच्या साहेबांना कळलं की हा माणूस कष्टाळू आहे. मेहनती आहे. सकाळी सर्वांच्या आधी कंपनीत हजर राहणे, सर्वांच्या नंतर ऑफिसच्या बाहेर पडणे आणि साहेब सांगतील ते काम जीव तोडून करणे, यामुळे त्यांना क्लार्कची बढती मिळाली. ते ज्युनिअर क्लार्क झाले.

ज्युनियर क्लार्क झाल्यावर त्यांना शिपायाचा गणवेश न घालता, इतरांसारखे कपडे घालून ऑफिसात वावरायला मिळू लागलं, ही गोष्ट त्यांना फार सुखावणारी होती, असे ते म्हणतात.

ज्युनियर क्लार्क म्हणून काही वर्षे खर्डेघाशी केल्यावर ते सिनियर क्लार्क झाले. तोपर्यंत मॅनेजमेन्टचा बराच विश्वास त्यांनी संपादन केला होता. आपल्याकडे शिक्षण नाही, साधी डिग्रीही नाही, आपल्याला आयुष्यात वर यायचं असेल तर फक्त मेहनत हे एकमेव साधन आहे, याची जाणीव त्यांना होती. त्यामुळे त्यांचा output हा सर्वात जास्त असे. त्यांचे असे वाहून घेणे आणि उशीरा थांबून काम करणे हे त्याकाळी त्यांच्या युनियनच्या नेत्यांना पटले नाही. हा माणूस मॅनेजमेन्टचा चमचा आहे, बॉसचा भडवा आहे वगैरे बरेच आरोप त्यांच्यावर त्या काळी झाले.

त्याच सुमारास त्यांना कंपनीने पुन्हा प्रमोशन देऊन ऑफिसर बनवलं आणि ते युनियनच्या त्रासातून बाहेर आले. ऑफिसर झाल्यावर ते मॅनेजमेन्ट मध्ये आले, त्यामुळे त्यांनी कधी यावं आणि कधी जावं, यावर युनियन हरकत घेऊ शकत नव्हती.

ऑफिसर झाल्यावर कंपनीच्या तर्फे correspondence करणं भाग आहे.त्यासाठी इंग्रजी चांगलं पाहिजे. म्हणजे झाली ना पंचाईत. सुरूवातीस ज्या स्टेनो त्यांचे डिक्टेशन घ्यायला जायच्या, त्या त्यांचे इंग्रजी ऐकून त्यांच्या तोंडावर हसून दाखवायच्या. यांना फार वाईट वाटायचं. आपल्याला शिक्षण घेता आलं असतं तर आपणही नीट इंग्रजी बोलू शकलो असतो, असा विचार त्यांच्या मनात येई. एक दिवस एका पारसी स्टेनोने त्यांना तोंडावर सांगितलं की, तुमच्यासारख्या निर्बुद्ध आणि अडाणी माणसाकडे डिक्टेशन घ्यायला जाणं, यासारखी वाईट गोष्ट आमच्यासाठी नाही. ही गोष्ट त्यांच्या खूप जिव्हारी लागली. तिचं हे बोलणं ऐकून ते क्लोकरूम मध्ये गेले आणि दार बंद करून तिथे रडलेही. पण यांनी त्यावरही मात केली. यांच्या पूर्वीच्या माणसांनी केलेल्या पत्रव्यवहाराच्या फाईल्स काढून ऑफिस संपल्यावर त्या वाचायचे आणि कुठल्या प्रसंगावर कुणी कसे पत्र लिहिले होते, त्यानुसार हे स्टेनोला डिक्टेशन द्यायचे. हळूहळू इंग्रजीवर पकड येत गेली. स्टेनोंचं कुत्सित हसणं आपोआप बंद झालं.  

सन २००९ अखेर वयाच्या ६० व्या वर्षी त्यांची निवृत्ती झाली. वयाच्या ८ व्या वर्षांपासून सुरू झालेल्या काबाडकष्टांचा दौर इथे संपायला हवा होता. पण यांना कामाशिवाय चैन पडत नाही. जेवायला नसेल तरी चालेल पण समोर काम पाहिजे. इंग्रजीत ज्याला वर्कोहोलिक म्हणतात तसे यांचे व्यक्तिमत्व आहे. २००९ ला निवृत्तीच्या आधी एक महिना, मॅनेजमेन्टने त्यांच्यासमोर दोन वर्षाच्या कंत्राटाचा पर्याय समोर ठेवला. म्हणजे, प्रॉव्हिडंट फंड, ग्रॅच्युईटी वगैरे सर्व पूर्ण सेटलमेन्ट करून, ऑफिशिअली ते रिटायर होऊन, पुढे त्यांना एका ठराविक मासिक रकमेवर दोन वर्ष काम उपलब्ध झाले. निवृत्तीनंतर काय करायचे हा त्यांचा मोठा प्रश्न दोन वर्षांसाठी सुटला. वयाच्या ६२ पर्यंत या माणसाने त्याच कंपनीत काम केले. दोन वर्षांनंतर कंत्राट वाढवून मिळावं अशी यांची इच्छा होती पण ते झालं नाही. यांना त्यानंतर घरी बसावं लागलं. २०१२ ला त्यांचा मला फोन आला होता. प्रश्न होता पुढे नोकरी मिळेल का?

म्हटलं, अहो बासष्ट वर्ष काम केलतं, आता पुरे की. पैशाला काय कमी आहे? मुलं मस्त मार्गाला लागली आहेत, बोरीवलीत मोठा फ्लॅट झालाय. चांगल्यापैकी सेव्हिंग केलयं आता सुखात रहा की.

ते म्हणाले, पैशाचा प्रश्न नाहीये. मी कामाशिवाय जगू शकत नाही. मी कामाशिवाय असा घरात बसलो तर आजारी पडेन.

महादशास्वामी षष्ठस्थानाचा बलवान कार्येश असल्यामुळे मी नोकरी मिळेल असे सांगितले. कुठे शोधू विचारता,  एखाद्या हॉटेलात बघा एखाद्या म्हणून सांगितले. महिन्याभरात बोरिवलीतील एका शेट्टीच्या हॉटेलात कॅशिअर कम मॅनेजर ची नोकरी मिळाली. पुन्हा मीटर डाऊन. आता हा माणूस सकाळी सात ते रात्री दहा पर्यंत तिथे राबायला लागला. तिथे त्यांचे काम पाहून तो शेट्टी खूश झाला. या माणसाने जर हे हॉटेल सांभाळले तर आपल्याला इतर व्यवसायांवर लक्ष केंद्रित करता येईल असा सूज्ञ विचार त्याने केला आणि यांनी भांडवल न गुंतवता, हॉटेलात भागिदारीची ऑफर २०१४ ला दिली.  तेव्हापासून हे गृहस्थ तिथे पार्टनर आहेत. धंद्याला रिटायरमेन्ट एज नसल्यामुळे, मरेपर्यंत काम करता येईल असे म्हणत खूश आहेत. काय नशीब असतं एकेकाचं.

आता जरा पत्रिकेकडे बघू.



वृषभ लग्नाची कुंडली आहे. लग्नेश शुक्र अष्टमात आहे आणि चंद्र पूर्वाफाल्गुनी नक्षत्रात असल्यामुळे जन्मत: शुक्राचीच महादशा आहे. लग्नेश अष्टमात असता काबाडकष्ट, शारीरिक त्रास, पीडा. त्यातून जन्मत: लग्नेशाची दशा असेल किंवा दशास्वामी अष्टमातल्या लग्नेशाच्या नक्षत्रात असेल, तर बालपण अत्यंत कष्टात जातं. इथे तेच झालं आहे.

वयाच्या चौथ्या वर्षी रविची महादशा सुरू झाली. १९५३ ते १९५९  या काळात शालेय शिक्षण झालं कारण रवि चतुर्थाचा स्वामी असून तो लाभेश गुरूच्या नक्षत्रात आहे. तसेच तो षष्ठस्थानाचाही कार्येश असल्यामुळे नोकरी सुरू झाली व अष्टमाचा बलवान कार्येश असल्यामुळे दैन्यावस्थाही सुरू राहिली.

त्यानंतर १९५९ ते १९६९ वयाच्या १० ते २० वर्षांपर्यंत चंद्राची महादशा होती. चंद्र चतुर्थात आहे पण शिक्षणाला विरोध करणार्‍या ३/ ८ या स्थानांचा बलवान कार्येश आहे. तसेच तो नवम स्थानाशीही संबंधीत नाही. त्यामुळे उच्चशिक्षण होऊ शकलं नाही. खरंतर १० ते २० हे शालेय व उच्चशिक्षणाचे वय आहे. पण ते होऊ शकले नाही. याचे कारण चंद्राने ३/८ ची फळे दिली. पण या काळात त्या फार्मा कंपनीत नोकरी मिळाली ज्यावर आयुष्यभर गुजराण झाली.

त्यानंतर १९६९ ते १९७६ मंगळ दशा, मंगळ सप्तमेश. विवाह या दशेत झाला.

पुढे १९७६ ते १९९४ राहुची महादशा आली. या दशेत नोकरीत खरी प्रगती. २/६/११ शी संबंधीत दशा. चतुर्थाशीही संबंध आहे. बोरीवलीत स्वत:ची जागा झाली.

१९९४ ते २०१० गुरू महादशा - प्रगती सुरूच राहिली.  दशे अखेरीस निवृत्त होऊनही कंत्राटावर काम सुरू. या दशेत दुसरा फ्लॅट घेऊन झाला. कारण गुरू हा चतुर्थाचा बलवान कार्येश आहे.

२०१० पासून शनि महादशा. षष्ठाशी संबंधीत. म्हणजे हे गृहस्थ यातही स्वकष्टार्जित धन मिळवणार. काम करत राहणार. त्यांना शुभेच्छा. 

ज्याला काम करायची इच्छा आहे व ज्याला ग्रहांची साथ आहे, तो कुठेही जाऊन उत्कर्ष करू शकतो, कितीही प्रतिकूल परिस्थिती असेल तरी त्यावर मात करून तो विजयी होतो. त्याचे ही कुंडली हे उत्तम उदाहरण आहे. 

भाग्य चालते कर्मपदाने, उमज खर्‍या वेदार्था.....
कर्तव्याने घडतो माणूस, जाणून पुरुषार्था..

आपला,
(कार्यरत) धोंडोपंत 



वरील कुंडलीच्या विरूद्ध म्हणजे उत्तम श्रीमंती व ऐश्वर्य असून, केवळ ऐशारामात आयुष्य घालवून, भिकेला लागलेल्या काही थोर व्यक्तिंच्या कुंडल्या मजजवळ आहेत. त्यातली एक पुढील लेखात देईन. 

आपला,
(आश्वासक) धोंडोपंत 


                                                                ॥ श्री साई समर्थ॥

Tuesday, February 3, 2015

महफ़िल बरक़रार है दोस्तों.....

॥ ॐ शं शनैश्चराय नम:॥

नमस्कार मित्रांनो,

लवकरच लिहायला सुरूवात करतोय. काळजी नसावी. 

मान्य आहे की नोव्हेंबर नंतर काहीही लेखन झालेलं नाही. तुम्ही अनेक माध्यमातून त्याचे स्मरण करून देत आहातच.  तुमचं हे प्रेम हीच माझी दौलत आहे. 

तर एक दोन तीन दिवसात इन्शाअल्ला तुम्हांला लेख वाचायला मिळेल.

विषयही आत्ताच सांगून टाकतो.विषय आहे " एका कष्टाळू माणसाची कुंडली"

आपला,
(आश्वासक) धोंडोपंत 

॥ श्री साई समर्थ॥


Friday, November 21, 2014

ऐसे गुण किती गाऊ........

॥ ॐ शं शनैश्चराय नम:॥

नमस्कार,

उद्या दिनांक २२ नोव्हेंबर रोजी शनिवार असून कार्तिक अमावास्या आहे. खरं तर अमावास्या आजच सुरू झाली आहे. पण शनिवार उद्या सूर्योदयाला म्हणजे, ०६ वाजून ५१ मिनिटांनी सुरू होईल. आपल्या पद्धतीनुसार उदयात उदयं वार:। म्हणजे आपला वार हा सूर्योदयाला सुरू होतो. रात्री बारा वाजता नाही. असो.

सांगायचे कारण हे की, उद्या शनिची उपासना करण्यासाठी अत्यंत महत्वाचा दिवस आहे. अमावास्या सायंकाळी ०६ वाजून ०२ मिनिटांपर्यंत आहे. 

तेव्हा सकाळी ०६.५१ ते सायंकाळी ०६.०२ हा कालावधी शनिउपासनेसाठी द्यावा आणि आपले भले साधावे. 

ज्यांना साडेसाती सुरू आहे म्हणजे तुला, वृश्चिक, धनु राशीच्या व्यक्ती, तसेच ज्यांना राहु वा शनिमहादशा सुरू आहे, त्यांनी ही सुवर्णसंधी सोडू नये. उद्याची उपासना फार चांगली फळेल. कधी काय केलं तर यश मिळतं, याला फार महत्व आहे, म्हणून हा लेखनप्रपंच.

काही वर्षांपूर्वी अशाच एका शनिअमावास्येला मी शनिदेवांची सेवा, उपासना सुरू केली आणि आजपर्यंत त्याचा पश्चात्ताप मला कधीच झालेला नाही. उलट शनिउपासनेत गेलेला प्रत्येक दिवस सार्थकी लागल्याची भावना माझ्या मनात आहे. त्या दिवशी मला हे कळलं की, संपूर्ण विश्वावर ग्रहांची सत्ता आहे. ग्रहांच्या सत्तेपासून देव-देवता, संत-महंत ही वाचलेले नाहीत. अन्यथा, प्रभुरामचंद्रासारख्या व्यक्तिला वैवाहिक व संततीसौख्य मिळायला हरकत नव्हती, योगेश्वर कृष्णाचा मृत्यू एका पारध्याकडून होण्याची गरज नव्हती, महादेवांना अपत्यप्राप्ती होणं सहज शक्य होतं.  रावणासारखा अतिबलाढ्य आणि शंकराचं वरदान असलेला माणूस साडेसातीत समूळ नाशाला गेला नसता. त्यामुळे या विश्वावर अंतिम सत्ता ही ग्रहांची आहे. तर ते असो.

ज्यांना शनिउपासना सुरु करायची आहे, त्यांनी उद्यापासून शनिमंत्राचा संकल्पपूर्वक जप सुरू करावा. शनिमंदिरात जाऊन शनिदेवांचे दर्शन घ्यावे. तेलाचा अभिषेक करावा, रुईच्या पानांची माळ अर्पण करावी. काळे उडीद वहावेत. नम्रपणे रहावे. मिजास करू नये. ॐ शं शनैश्चराय नम: जपत स्वस्थपणे रहावे.

दाक्षिणात्य मंदिरांमध्ये नवग्रहाचे मंदिर असतं. त्या ठिकाणी शनिवारी, भावुका अमावास्येला आणि शनिअमावास्येला काळ्या रंगाच्या कापडात काळे उडीद बांधून, ती पुरचुंडी तेलात बुडवून जाळली जाते. याचा उद्देश लागलेली पनोती जळून जावी, हा असतो. ज्यांना हा विधी करणे शक्य आहे, त्यांनी तो करावा.  माटुंग्याच्या आस्तिक मंदिरातील नवग्रह मंदिरात हे करता येतं. 

कोपरगाव, शिर्डी, राहता, राहुरी, नेवासा, संगमनेर, लोणी  या परिसरातील लोकांना शनिशिंगणापूरला जाणे सहजशक्य आहे. ज्यांना जमेल त्यांनी उद्या शनिशिंगणापुरी जाऊन यावे. काय प्रचीती येतेय, ते मला कळवावे.

नीलांजन समाभासं रविपुत्रं यमाग्रजम्‌।
छायामार्तंड संभूतं तं नमामि शनैश्चरम्‌॥

आपला,
(शनिमय) धोंडोपंत
सर्वांचे सर्वकाळ भले चिंतणार



॥ श्री साई समर्थ॥