धन्यवाद आणि दंडवत

लोकहो,

कळविण्यास आनंद होतो की, तुमच्या सर्वांच्या आवडत्या या "धोंडोपंत उवाच" ब्लॉगाला " ब्लॉग माझा" या "स्टार माझा" वाहिनीने घेतलेल्या स्पर्धेत पारितोषिक मिळाले आहे.

काल रात्री ८.०० वाजता "ब्लॉग माझा" या कार्यक्रमात त्याची घोषणा करण्यात आली, असे आम्ही ऐकून आहोत. त्यावेळेस आम्ही ज्योतिषविषयक कन्सलटेशनमध्ये व्यग्र असल्याने आम्ही तो कार्यक्रम पाहू शकलो नाही. पण अनेकांचे अभिनंदनाचे फोन आले. सर्वप्रथम मृदुलाताई तांबे यांचा फोन आला तेव्हा आम्हाला ही बातमी कळली. त्यानंतर लगेच श्री. अमोल केळकर यांचा फोन आला आणि मग फोनवर फोन येत होते. काही जणांनी गुगल निरोपकावर संपर्क साधला, काहींनी ईपत्र पाठवले.

आमच्या लेखनावर प्रेम करणार्‍या सर्व चाहत्यांना, तसेच स्टार माझा चे संचालक श्री. राजीव खांडेकर, श्री. प्रसन्न जोशी आणि या स्पर्धेचे अत्यंत ज्ञानी आणि व्यासंगी परीक्षक, संगणक क्षेत्रातील अग्रणी, अष्टपैलू व्यक्तिमत्व श्री. अच्युतराव गोडबोले यांना आमचा दंडवत आणि धन्यवाद!!!

लोकहो,

आम्ही गेले दीड वर्ष या शारदेच्या यज्ञात ज्या समिधा अर्पण केल्या, ज्योतिषशास्त्राचा समाजाला उपयोग व्हावा म्हणून जे रोप लावले, त्या "इवल्याशा रोपाचा वेलू गगनावरी गेला" याचा आनंद आहे. या ब्लॉगाला तुमच्यासारख्या वाचकांचे प्रेम लाभले, अनेक जण या ब्लॉगाच्या माध्यमातून आमच्यापर्यंत पोहोचले, जगातल्या बहुतेक सर्व भागात राहणार्‍या अनेकांशी स्नेह निर्माण झाला, अनेकांना जे मार्गदर्शन हवे होते ते मिळाले.

"याचसाठी केला, होता अट्टाहास..... शेवटला दिस, गोड व्हावा"

एखाद्या अज्ञात शक्तीकडून प्रेरणा आल्यासारखे या ब्लॉगावरील सर्व लिहून झाले आहे. कुठल्याही नोट्स, कुठलेही पॉईंट्स, कुठलीही कात्रणे न काढता, जे जे त्यावेळेस "तो" सुचवायचा, ते ते आम्ही टंकित केले आहे. त्यामुळे या लेखनात जिवंतपणा आहे, याचा अनुभव तुम्ही घेतला आहेच.

"तुका म्हणे माझे, हेचि भांडवल..... बोलविले बोल, पांडुरंगे"

हे सर्व "त्याच्या" कृपेनेच झाले आहे त्यामुळे या ब्लॉगाला मिळालेली वाचकांची दाद, यश आणि पारितोषिक याबद्दल सर्वांना दंडवत घालतो आणि हे सर्व "त्यालाच" अर्पण करून आम्ही मोकळे होतो.

आम्ही तेणे सुखी। म्हणा विठ्ठल विठ्ठल मुखी॥

तुमचे येरं वित्त धन। ते मज मृत्तिकेसमान॥

कंठी मिरवा तुळशी। व्रत करा एकादशी॥

म्हणवा हरिचे दास। तुका म्हणे मज ही आस॥

आपला,
(नामानिराळा) धोंडोपंत