Thursday, September 25, 2008

मन मोकाट मोकाट....






दिनांक २४/०९/२००८

सायंकाळी ७.३० वाजता नाशिकहून सौं. च्या बालमैत्रिणीचा फोन आला. त्यांच्या गप्पा सुरू असतांना सौ. ने विचारले की, " तिच्या मैत्रिणीच्या आईला बरे नाही आहे आणि त्यांची कुंडली पाहून त्यांना आजारातून कधी बरे वाटेल हे सांगायचे आहे."

"जन्मतपशील घेऊन ठेवा आणि रात्री ९.३० ला फोन करायला सांगा" असे सांगितले.

आम्ही रात्री ०८ वाजून १० मिनिटांनी कुंडली पाहिली तेव्हाचे रुलिंग प्लॅनेट्स असे होते.


L- मेष - मंगळ , S - पुष्य - शनी ( राहु) , R - कर्क - चंद्र (केतु) , D - बुध - बुध

प्रश्न शनीच्या नक्षत्रावर विचारला गेला होता. शनीच्या नक्षत्रावर एखाद्या व्यक्तिच्या आजारपणाबद्दल प्रश्न विचारला गेला असेल, तर उत्तर बहुधा नकारार्थी येते.

आजारपणातून मुक्तता होईल का? हा प्रश्न जन्मकुंडलीवरून पहात असल्यास या प्रश्नासाठी महादशा स्वामी विचारात घ्यावा. जर हा प्रश्न प्रश्नकुंडलीवरून पहायचा झाल्यास षष्ठ स्थानाचा उपनक्षत्रस्वामीवरून हा प्रश्न पहावा.

सध्या या कुंडलीला बुधाची महादशा सुरू आहे. वरील लग्न कुंडलीत बुध चतुर्थात असून तो लग्नेश व दशमेश आहे. तसेच तो रविच्या नक्षत्रात असून रवी चतुर्थात आहे आणि व्ययेश आहे. व्ययस्थान हे हॉस्पिटलायझेशनचे स्थान आहे.

गेल्यावर्षीपासून या बाईंचे मानसिक संतुलन ढासळले आहे. पूर्वी जरा हिस्टेरिक किंवा विचित्र वागायच्या. पण गेल्या वर्षभरात परिस्थिती हाताबाहेर गेली आहे. सायकिऍट्रिस्टचे उपचार चालू आहेत. हल्ली त्या फार कमी वेळ भानावर असतात. घरात हातवारे करीत मोठ्यामोठ्याने असंबद्ध बडबडत राह्तात, मधूनच रडतात, मधूनच भिंतीवर धडका मारतात. त्यांना सांभाळणे ही मोठी डोकेदुखी झाली आहे. अशा परिस्थितीत कुटुंबियांची काय अवस्था होत असेल याची कल्पना केलेली बरी.

कुंडलीत बाराव्या भावावर नजर टाकल्यास मंगळ नेपच्यून आणि केतू हे तीन ग्रह बाराव्या भावाची फळे देणार आहेत. त्यात मंगळ आणि केतू हे अंशात्मक युतीत असल्याने ज्या ज्या स्थानांचा मंगळ कार्येश होईल त्या त्या स्थानांचा केतुसुद्धा कार्येश होतो.

मंगळ व्ययात असून मंगळाची वृश्चिक रास तृतीयात असल्याने केतुसुद्धा तृतीय स्थानाचा कार्येश होतो. केतुचा जेव्हा तृतीयाशी संबंध येतो तेव्हा ते लोक काही तरी गंडाने, मानसिक आजाराने पछाडलेले असतात. जेव्हा जेव्हा केतु ज्या स्थानात असतो त्या स्थानाशी संबंधीत दशा/अंतर्दशा येतात तेव्हा तेव्हा हे मानसिक आजार/ विकृती/ भयगंड उचल खातात.

सध्याच्या बुध महादशेत बुध रवीच्या माध्यमातून व्ययस्थानाची फळे देतो आहे त्यामुळे गेल्या वर्षभरात या आजाराने उचल खाल्ली आहे.

तसेच व्ययातला केतु हा जसा अध्यात्ममार्ग दाखवतो. तसेच तो केतु जर नेपच्यूनयुक्त व्ययात असेल तर हे लोक कोणत्यातरी भोंदू बाबाच्या नादाला लागून आयुष्यात फसतात. या कुंडलीत हा ही योग आहे.

या बाईंचा नाशिकचा एक भोंदू माणूस गुरू आहे. आणि त्यांच्या त्या तथाकथित "गुरू माऊली" च्या कृपेनेच हे अवघे विश्व चालले आहे, त्यांच्या गुरू माऊली काहीही करू शकतात, त्यांना अशक्य काहीच नाही वगैरे वगैरे... विकृत संकल्पना त्यांच्या मनात आहेत. त्यांची लहान मुलगी सुद्धा (जिने प्रश्न विचारला आहे तिची लहान बहीण) या गुरूमाऊलींच्या आशीर्वादासाठी तळमळत असते. तीही बहुधा तिच्या आईच्याच मार्गाने जात आहे अशी खंत प्रश्नकर्तीने व्यक्त केली आहे.

आता या बाई या मानसिक आजारातून बर्‍या होतील की नाही हे पाहू.

जर का दशास्वामी पंचम आणि लाभस्थान या दोन्ही स्थानांचा बलवान कार्येश असेल तर त्या ग्रहांच्या दशा अंतर्दशेत रोगमुक्ती होते.

या कुंडलीला सध्या बुधाची महादशा सुरू असून त्या महादशेअंतर्गत बुधाचीच अंतर्दशा सुरू आहे. बुध वर सांगितल्याप्रमाणे चतुर्थात असून तो लग्नेश आणि दशमेश आहे. तो रविच्या माध्यमातून चार आणि बारा या स्थानांचा बलवान कार्येश झाला आहे.

बुध कुंडलीत पंचमस्थानाचा आणि लाभस्थानाचा दूरान्वयेही कार्येश होत नाही. त्यामुळे रोगमुक्ती होऊन त्यांना पूर्णपणे बरे वाटणार नाही, असेच सांगावे लागले.

तसेच महादशास्वामी बुध हा रवीच्या माध्यमातून व्ययस्थानाची जोरदार फळे देईल. त्यामुळे या बाईंना हॉस्पिटलमध्ये (वेड्यांच्या) दाखल करावे लागेल, हे सूर्यप्रकाशाइतके स्पष्ट आहे.

या परिस्थितीतून त्या बाईंना बाहेर काढण्यासाठी त्यांचे ढोंगी गुरू (सॉरी त्यांची गुरूमाऊली) काहीही करू शकणार नाहीत. ग्रह आपापली कामे चोखपणे करीत असतात, हे वास्तव आहे.

आपला,
(वास्तववादी) धोंडोपंत

Monday, September 22, 2008

भावारंभ पद्धत


धोंडोपंत,

आपले सर्वच लेख माहितीपूर्ण आणि रोचक असतात. या लेखातही आपण अतिशय सुरेख विवरण केले आहे. पुष्कर आणि त्यांच्या सौ. कां. ना सुदीर्घ आणि सुखी वैवाहिक जीवन लाभो या शुभेच्छा!

एक शंका: कस्प कुंडलीत तिसऱ्या आणि चौथ्या घरात दोन्ही ठिकाणी "३" राशी दाखवली आहे. त्यामुळे की काय बारा घरांमध्ये अकराच राशी आल्या आहेत. (मीन रास कुंडलीत नाही). ही संगणकाच्या कार्यक्रमाची चूक आहे की कस्प कुंडलीचा काही विशेष आहे? कृपया खुलासा कराल काय?

आभार,

Mon Sep 22, 01:28:00 AM IST

एका वाचकांचा वरील अभिप्राय आला आहे. उपरोक्त लेख ज्या कुंडलीवर लिहिला आहे त्या प्रश्नकुंडलीत मिथुन रास ही तृतीय आणि चतुर्थ स्थानात दाखवली आहे तर धनु रास नवम व दशम स्थानात दाखवली आहे. तसेच त्या भावचलित कुंडलीत कन्या आणि मीन या दोन राशी लुप्त आहेत. वाचकांना असे वाटते की ही कदाचित संगणक कार्यक्रमाची चूक आहे किंवा कस्प कुंडलीचे वैशिष्ट्य? त्याबद्दल त्यांनी विचारणा केली आहे.

या मुद्यावर ब्लॉगावर उत्तर लिहू जेणेकरून इतरांनाही त्याबद्दल समजेल असे आम्ही त्यांना सांगितले होते. त्याबद्दल आत्ता लिहितो म्हणजे झाले.

जन्मलग्न कुंडली बनवतांना एका स्थानात एक रास अशा पद्धतीने लिहिली जाते. याला भावमध्य पद्धत म्हणतात. येथे तीस अंशाची रास कल्पून एका स्थानात एक राशी याप्रमाणे कुंडलीत लिहिली जाते आणि जन्म किंवा प्रश्नवेळेचे स्पष्टग्रह त्यानुसार कुंडलीत दर्शविले जातात. आपण जी नेहमी कुंडली मांडतो ती या पद्धतीने मांडतो.

पण गुरूवर्य श्री. कृष्णमूर्ती यांनी भावचलित कुंडलीसाठी ही भावमध्य पद्धत नाकारून भावारंभ पद्धत स्विकारली आहे. उपरोक्त कुंडलित पहा. लग्नभाव मेषेच्या ४ अंश ४६ कला ४० विकलांवर सुरू झाला आहे. द्वितीय भाव वृषभेच्या ५ अंश ५५ कला ३० विकलांवर सुरू होतो आहे. त्यामुळे प्रथम आणि द्वितीय स्थानात मेष आणि वृषभ राशींचे अनुक्रमे १ व २ अंक आले आहेत.

आता तिसरा भाव पहा. तिसरा भाव मिथुनेच्या २ अंश ६ कला ५८ विकलांवर सुरू झाला आहे. त्यामुळे तिथे मिथुनेचा ३ अंक आला आहे. इतपत ठीक आहे.

आता चतुर्थभावारंभ नीट पहा. तो कर्केत नसून मिथुनेतच २७ अंश १२ कला ६ विकलांवर सुरू होत आहे. त्यामुळे इथे ४ हा कर्क राशीचा अंक न लिहिता मिथुनेचा ३ हा अंक आला आहे.

पंचमभाव कर्केच्या २४ अंश ४० कला ५६ विकलांवर सुरू होतो आहे. त्यामुळे पंचमात कर्केचा ४ हा अंश आहे.

षष्ठभाव सिंहेच्या २७ अंश २४ कला २४ विकलांवर सुरू होत आहे. त्यामुळे तिथे सिंहेचा ५ अंक आहे.

पुढे गंमत पहा

षष्ठ भाव सिंह २७ अंश २४ कला २४ विकला येथे सुरू झाला. त्यानंतर कन्या राशीचे अंश त्यात आले आणि त्याही पुढे जाऊन तुळेचे ०४ अंश ४६ कला ४० विकलांपर्यंत हा भाव पोहोचला आहे.

त्यामुळे सप्तमभावाच्या आरंभी कन्या न येता तुळ रास आली आहे. सप्तमभावारंभ तुळ ४ अंश ४६ कला व ४० विकलांवर सुरू होतो. इथे कन्या राशी लुप्त झाली आहे.

तसाच पुढे नवम व दशम भावारंभ धनु राशीचा असून मीन रास कुंडलीत लुप्त झाली आहे. भावचलित कुंडली हा अत्यंत किचकट प्रकार आहे हे आम्ही मान्य करतो.

सदर वाचकांच्या प्रश्नाचे उत्तर आता मिळाले असेल असे गृहीत धरतो.

आपला,
(क्लिष्ट) धोंडोपंत


Sunday, September 21, 2008

ना कळे कधी कुठे मन वेडे गुंतले......




दिनांक ०५ सप्टेंबर २००८

सकाळी आठ वाजता पुष्करचा फोन. म्हटलं, "बोल रे"

" पंत, आत्ता मी तुमच्या घरी येतोय. तुमच्याशी महत्वाच्या विषयावर बोलायचेच आहे. नाही म्हणू नका."

आम्हाला कळेना की हा पुष्कर इतका का पेटलाय? म्हणून विचारले " अरे, झालं तरी काय?"

" आज काय तो सोक्षमोक्ष लावायचाय मला."

"कुणाचा?"

" तुम्ही विसरलात का पंत? ते ऑफिसमधलं सांगितलं होतं ना तुम्हाला? तेच ते"

ते ऑफिसमधलं काय ते तेव्हा चटकन आमच्या लक्षात आलं नाही. त्याला म्हटले, " तू नऊ वाजता ये. तोपर्यंत आमचा जप उरकेल. मग बोलू. दहा वाजता कन्सलटेशन सुरू होतील. त्या आधी तुझं काम करून घेऊ."

पुष्कर हा अत्यंत सालस आणि गुणी मुलगा. मूळचा आंबेगावचा. पुण्यातून बी कॉम झाला आणि तिथल्याच एका को-ऑपरेटिव्ह बॅंकेत नोकरीला लागला. घरची परिस्थिती बेताची. वडिलोपार्जित थोडी शेती. ज्यावर कुटुंबाचे भागणे कठीण. त्यामुळे पुढील शिक्षण, नोकरी करत-करत पूर्ण करण्याशिवाय त्याला पर्यायच नव्हता. बॅंकेत नोकरी करत हा एम. कॉम. झाला आणि कॉम्प्यूटरचा कुठलातरी कोर्स केला. पुढे बॅंकेने त्याला ऑफिसर म्हणून बढती दिली आणि मुंबईला ट्रान्स्फरदेखील. तो मुंबईत आल्यापासून त्याचा आणि आमचा परिचय.

मुंबईत आल्यावर त्याच्याच ब्रॅंचमधील एका मुलीच्या प्रेमात पडला. ती त्याला मनोमन आवडायला लागली. बॅंकेमुळे रोजचा संपर्क. हळूहळू स्नेह वाढत गेला. त्याच्या आवडीचे पदार्थ ती डब्यातून आणायला लागली. जे काही चित्रपटात घडतं तसंच. पण याचा स्वभाव बुजरा. पुढाकार घेऊन तिला विचारावं, मागणी घालावी, असे धैर्य त्याच्यापाशी जमा होत नव्हतं.

काही महिन्यापूर्वी जेव्हा त्याची पत्रिका आम्ही पाहिली तेव्हा, "पंत, माझा प्रेमविवाह होईल का?" हा प्रश्न तो खोदून खोदून विचारत होता, तेव्हाच आम्हाला समजले की हा बाप्या कुठेतरी लढतोय.

मग आम्ही त्याला विचारले की, "काय तुझे चालू आहे का कुठे?" तेव्हा त्याने वरील कहाणी ऐकवली.

आम्ही त्याला सांगितले की,

" तुझ्या कुंडलीत प्रेमविवाहाचा योग जरूर आहे. पण जुलै पर्यंत थांब. घाई करू नकोस. कारण सध्याची महादशा तुला प्रेमप्रकरणात यश दाखवत नाही. पण जुलै अखेरीस सुरू होणारी महादशा व अंतर्दशा तुला ५/७ देते आहे. त्या काळात तुला मनाप्रमाणे सहचारिणी मिळेल. "

तो "ठीक आहे" एवढेच म्हणाला. त्यानंतर पुढे हा विषय कधी निघाला नाही. आज अचानक सोक्षमोक्ष लावण्यापर्यंत हा बोलतोय म्हणजे नक्की काय भानगड झालेय, हे आम्हालाही समजेना.

बरोब्बर नऊ वाजता पुष्कर हजर झाला. स्वामींच्या तसबीरीला हात जोडून आमच्या समोर बसला. म्हटलं,

"बोल, कसला सोक्षमोक्ष लावायचाय."

"तेच ते तुम्हाला तिच्याबद्दल सांगितलं होतं ना? आज मी तिला विचारणार आहे कुठल्याही परिस्थितीत. तुम्ही म्हणाला होतात जुलै पर्यंत थांब, म्हणून थांबलो. अजूनही तिला विचारायचा धीर होत नाहिये. पण काल विचार केला की हे असं किती दिवस ढकलायचं? दुसरा कोणीतरी तिला प्रपोज करेल आणि मला असच बसायला लागेल हरी हरी करत."

तो सगळं एका दमात बोलला. आम्ही त्याच्या कुंडलीचा प्रिंट आऊट ठेवलेली फाईल काढली. त्यात आम्ही शेरा लिहिला होता, " २६ जुलै नंतर प्रेमप्रकरणात पुढाकार घ्यावा."

त्याला म्ह्टलं, " आम्ही तुला २६ जुलै पर्यंत थांबायला सांगितलं होतं. ऑगस्ट फुकट घालव... असं नव्हतं सांगितलं."

तो काकुळतीला येऊन म्हणाला, " अहो पंत, मी तुमच्यावर बिल फाडत नाही आहे हो! पण मलाच धीर होत नाही आहे. मला आत्ता सांगा की ती होकार देईल म्हणून. ते तुमच्याकडून ऐकलं तर मला विचारायचे धैर्य येईल. फार वाईट हालत झालेय माझी."

म्हटलं, " अरे असं घाबरून कसं चालेल? पुरूषासारखा पुरूष आणि असा भागुबाईसारखा वागतोस? प्यार किया तो डरना क्या? सांग तिला जाऊन " हम काले है तो क्या हुआ दिलवाले है... हम तेरे तेरे तेरे चाहनेवाले है"

आम्ही जरा त्याच्यात हवा भरण्याचा प्रयत्न केला पण तो त्याच्या मानसिकतेतून बाहेर येईना. म्हटलं, " हे बघ. तुझा प्रश्न असा आहे ना की तू तिला मागणी घातल्यावर ती होकार देईल का? म्हणजेच तुला असे विचारायचे आहे की तुला तुझ्या प्रेमप्रकरणात यश मिळेल का? बरोबर?"

तो म्हणाला, " एकदम बरोबर"

म्हटलं, " मग त्यात काय एवढं? आपण कृष्णमूर्ती पद्धतीवरून अशा अनेक प्रश्नांची उत्तर चुटकीचरशी देतो. तू एक काम कर. मनात हा प्रश्न नीट घोळव की मला माझ्या प्रेमप्रकरणात यश मिळेल का? आणि आम्हाला १ ते २४९ मधला एक नंबर सांग. हा नंबर उस्फूर्तपणे आला पाहिजे. लकी नंबर किंवा भाग्यांक वगैरे द्यायचा नाही. जर का तुला नंबर द्यायला जमत नसेल तर समोरचे पुस्तक उचल आणि त्यातील पान उलटून येईल तो नंबर दे. ठीक आहे? घाई करु नकोस. तू किती तळमळीने प्रश्न विचारला आहेस हे आम्हाला कुंडलीवरून समजणार आहे."

तो "बरं" म्हणाला. डोळे मिटून त्याने आधी मनात प्रश्न धरला असावा. मग ओठातल्या ओठात कुठलातरी मंत्र पुटपुटला आणि म्हणाला " पाच"

आम्ही तात्काळ म्हणालो, " झाले तुझे काम. ती होकार देणार. "

तो म्हणाला, " कशावरून?"

" डिव्हाईन गाईडन्स म्हणून. अरे, पाच हे स्थान प्रेम आणि प्रणयाचे आहे. तू नंबर दिलास तो त्याच स्थानाचा. आपण पाच नंबराची प्रश्नकुंडली मांडून पाहू."

पाच क्रमांकाची दिनांक ०५/०९/२००८ रोजी सकाळी ९.२१ वाजता दादर, मुंबई येथे बनविलेली प्रश्नकुंडली वर दिली आहे. त्यावर टिचकी मारल्यावर ती नेहमीप्रमाणे मोठी दिसेल. सोबत प्रश्नवेळेचे स्पष्टग्रह आणि स्पष्टभाव दिले आहेत.

या कुंडलीत चंद्र सप्तमस्थानात असून त्याची कर्क राशी पंचमात आहे. जातकाचा प्रश्न प्रेम आणि विवाह यासंबंधी आहे हे कुंडली सांगते आहे. म्हणजे जातकाने तळमळीने प्रश्न विचारला आहे.

याकुंडलीत पंचमस्थानाचा सबलॉर्ड राहु आहे. राहु स्वत: दशमात आहे. तो चंद्राच्या श्रवण नक्षत्रात असून चंद्र सप्तमात आहे व कर्क रास पंचमात आहे. चंद्र आणि रवि कधीही वक्री नसतात. इथे चंद्र नक्षत्रस्वामी असल्यामुळे "पंचमाचा उपनक्षत्रस्वामी वक्री ग्रहाच्या नक्षत्रात नसावा" ही अट आपोआप पूर्ण होते. तसेच राहू व केतू हे कायम वक्री असल्यामुळे कृष्णमूर्ती पद्धतीत ग्रहांचे कार्येशत्व अभ्यासतांना ते मार्गीच धरले जातात. त्यामुळे दुसरी अट " उपनक्षत्रस्वामी स्वत: वक्री असेल तर तो मार्गी होईपर्यंत इच्छापूर्ती होत नाही’ ही अटसुद्धा उपनक्षत्रस्वामी राहू असल्याने आपोआप पूर्ण होते.

म्हणजे राहू सप्तम आणि पंचम या दोन स्थानांचा बलवान कार्येश आहे जी स्थाने आपल्याला पाहिजे आहेत. तसेच राहू मकरेत असून शनी पंचमात आहे व शनीच्या राशी अकरा व बारा या भावारंभी आहेत. म्हणजे शनी पाच (प्रणय प्रेमसंबंध) व अकरा (इच्छापूर्ती) या स्थानांचा कार्येश आहे.

हे झाले सर्व टेक्निकल आस्पेक्ट्स. आता शेवटचा नियम जो आम्ही वापरतो. तो म्हणजे प्रेमविवाह होण्यासाठी कुंडलीतील शुक्राचा मंगळ, राहु, हर्षल, नेपच्यून यापैकी किमान एका ग्रहाशी संबंध असणे आवश्यक आहे. वरील कुंडलीत शुक्र मंगळाच्या अंशात्मक युतीत आहे. त्यामुळे ती होकार देणार हे नक्की.
आम्ही पुष्करला म्हटले, " हॉल बुक कर जाऊन."

" काय सांगताय काय?"

"समजत नाही का आम्ही काय म्हणतोय ते? अरे वेड्या ती तुझी वाट पहातेय. चल पळ लवकर आणि तिला प्रपोज कर. "

" मुहूर्त द्या"

" अरे मुहूर्त कसला? शुभस्य शीघ्रम। रुलिंग प्लॅनेट्स पहा. शुक्र अत्यंत बलवानपणे रुलिंगमध्ये आहे. आत्ता तूळ लग्न सुरू आहे. ते संपले तरी राशीस्वामी आणि Day Lord म्हणून शुक्र दिवसभर रुलिंगमध्ये आहेच. शुक्र असा बलवान असतांना प्रपोज करावं. आजच काय ते कर. "

" नक्की"

" आणि हो!... गणपती सुरू आहे. तिने होकार दिला की लालबागच्या राजाला जोड्याने जाऊन या. आणि आपल्या स्वामींच्या मठात जाऊन आशीर्वाद घ्या"

"हो हो. ते तर करूच"

पुष्कर नमस्कार करून निघून गेला. त्याला जे "धैर्य" पाहिजे होतं ते प्रश्नकुंडलीने दिलं. कुंडलीने सांगितल्याप्रमाणे तिच्याकडून होकार आला. लालबागच्या राजाला आणि स्वामींना जोडीने पाया पडून आले. आज दोघेही संध्याकाळी घरी येऊन गेले.

तिला म्हटले, " किती तंगवलेस याला? बिचारा रडायला आला होता."

कुंडल्यांच्या ढिगातून त्याची प्रश्नकुंडली काढली आणि इथे लिहिले.

त्या दोघांचे जीवन आनंदमय आणि सुखमय होवो, अशी श्री स्वामीचरणी प्रार्थना.

आपला,
(शुभचिंतक) धोंडोपंत


Friday, September 12, 2008

घर घेऊ का घर?

आयुष्यात स्वत:चे हक्काचे मालकीचे घर असणे ही प्रत्येकाची महत्वाकांक्षा असते. काहींचा अपवाद सोडून देऊ. त्यासाठी माणूस वाट्टेल ते करायला तयार असतो. कर्ज काढल्याशिवाय घर घेता येईल अशी बहुतेकांची परिस्थिती नसते. त्यामुळे कर्जाचा बोजा डोक्यावर घेऊन नवीन घरात प्रवेश करावा लागतो. हे अपरिहार्य आहे.

जर उत्पन्नाचे साधन चांगले असेल तरच कर्ज मिळते. अन्यथा एका ठिकाणाहून दुसर्‍या ठिकाणी अशी मजल दरमजल करीत माणूस स्वत:चे घर व्हावे म्हणून धडपडत असतो. अनेकांना घर मिळते पण ती वास्तू लाभत नाही. नवीन घरात गेल्यावर भांडणे, वादविवाद असे मनस्ताप देणारे प्रसंग घडतात. झक मारली आणि घर घेतलं असे म्हणण्याची पाळी काही जणांवर येते.

जन्मकुंडलीनुसार मार्गदर्शन घेऊन जर घराचा प्रश्न सोडवला तर त्यामुळे अनेक समस्या टाळता येतात. घर घ्यावे की नाही, कधी घ्यावे, कोणत्या भागात घ्यावे, गृहप्रवेश कधी करावा अशा अनेक प्रश्नांची चोख उत्तरे ज्योतिषशास्त्र देऊ शकते. त्यासंबंधी थोडे विवेचन.

घर घेण्यासाठी मुळात कुंडलीत घराचा योग असणे आवश्यक आहे. तो जर नसेल तर कितीही आटापिटा केला तरी योग्य घर मिळत नाही आणि मिळाले तरी त्यापासून सुख-शांती लाभत नाही.

घर कोण घेऊ शकतं किंवा कोणाच्या मालकीचे स्वत:चे घर होऊ शकते याचे उत्तर असे की.

नवमांश कुंडलीतील चतुर्थेश हा जर जन्मकुंडलीत २, ४, ११, १२ यापैकी एका तरी स्थानाचा कार्येश असेल तर स्वत:चे घर होते. नुसते एवढे असून चालत नाही. तर नवमांश चतुर्थेशाचा किंवा लग्न कुंडलीतील चतुर्थेशाचा किंवा चतुर्थस्थानाचा शनी किंवा मंगळ यांच्याशी संबंध असणे आवश्यक आहे. शनी व मंगळ हे स्थावर मालमत्तेचे कारक ग्रह आहेत. त्यांचा चतुर्थस्थानाशी किंवा चतुर्थेशाशी संबंध असल्याशिवाय त्या व्यक्तिची स्वत:ची वास्तू होत नाही.

घर कधी घेता येते?

ज्यावेळेस जन्मकुंडलीत २, ४, ११, १२ या स्थानांच्या कार्येश ग्रहांच्या अंतर्दशा आणि विदशा सुरू असतात, तेव्हाच घर घेता येते. त्याचप्रमाणे हा दशास्वामी सुद्धा शनी आणि मंगळाशी संबंधीत असावा लागतो.

जर का शेतजमीन घ्यायची असेल किंवा फार्म हाऊस घ्यायचे असेल तर अंतर्दशा स्वामी शनी आणि मंगळ या दोघांशी संबंधीत असायला हवा.

नुसताच जर फ्लॅट घ्यायचा असेल, स्वत: जमीनीची मालकी न घेता केवळ केलेल्या बांधकामाची मालकी हवी असेल, तर दशास्वामीचा फक्त मंगळाशी संबंध असणे पुरेसे आहे. शनीशी नसला तरी चालेल.

काही लोकांची एकाहून जास्त घरे होतात. बहुतेक वेळा अशा व्यक्तिंचा नवमांश चतुर्थेश बुध असतो किंवा बुधाच्या नक्षत्रात असतो.

ज्यांच्या जन्मकुंडलीत चतुर्थस्थानात राहु असेल, त्या लोकांनी शक्यतो स्वत:च्या नावावर घर घेऊ नये. घेतले तर ते Joint नावाने घ्यावे. एकट्याच्या नावे घेऊ नये. तसेच त्या लोकांनी कुणाचे जुने घर घेऊ नये. अशा वास्तूला शाप असतो. नवीन घर घेऊन त्यांना समाधान, शांती मिळत नाही.

याचे कारण जर चतुर्थात राहु असेल किंवा नवमांश चतुर्थेश राहुच्या नक्षत्रात असेल किंवा राहुच्या युतीत असेल तर अशा लोकांना बाधित वास्तू मिळते. अशा घरात अवश्यमेव सतत भांडणे, आजारपण, संकटांची मालिका, नुकसान अशा गोष्टी वारंवार घडतात. चतुर्थात शुक्र आणि राहु यांची युती असेल तर त्या वास्तूला स्त्रीचा शाप असतो.

घरासाठी गुंतवणूक करतांना ज्या ग्रहाच्या विदशेत ४ आणि १२ ही स्थाने कार्यरत आहेत अशा विदशेत घराचे बुकिंग करावे. चतुर्थ हे घराचे स्थान आहे आणि १२ हे त्यासाठी होणार्‍या खर्चाचे.

तसेच जो विदशास्वामी ४ आणि ११ ही स्थाने देतो त्या काळात घराचे पझेशन घ्यावे. ती विदशा नवीन घराचा ताबा घेण्यास लाभदायक असते.

घरासाठी कर्ज मिळेल का?

जर महादशास्वामी २ व ६ या स्थानांचा कार्येश असेल तर कर्ज मिळविण्यात अडचणी येत नाहीत. त्या काळात घरासाठी कर्ज घ्यावे म्हणजे ते विनासायास मिळते. तसेच १२ वे स्थान हे कर्जमुक्तीचे स्थान आहे. महादशास्वामीने ते ही दिले पाहिजे तरच घेतलेले कर्ज फिटेल.

जुने घर कधी बदलावे?

ज्यावेळेस तृतीयस्थानाशी संबंधीत अंतर्दशा विदशा सुरू असतील तेव्हा राहते घर बदलावे. तृतीय हे चतुर्थाचे व्ययस्थान आहे त्यामुळे वास्तूत बदल करण्यास ते हातभार लावते.

जुने घर कोणी घ्यावे?

ज्यांचा नवमांश चतुर्थेश शनी आहे किंवा जन्मकुंडलीत चतुर्थस्थानात शनी आहे अशा लोकांनी जुने घर विकत घ्यावे. त्या लोकांना जुन्या वस्तू आणि वास्तू लाभतात. त्या लोकांनी गाडीसुद्धा सेकंड हॅण्ड घ्यावी.

आम्ही एका जातकाला असा सल्ला दिला होता. त्याला म्हटले की आठ लाख खर्च करण्यापेक्षा तू हेच मॉडेल सेकंड हॅंड मिळते का बघ. तुला खूप फायदा आहे.

सुरूवातीला तो म्हणाला की, " तशी माझी परिस्थिती नाही पंत. I can easily afford a new car."

आम्ही त्याला म्हटले की, " तू सेकंड हॅंड गाडी मिळते आहे का ते बघ. तुला उत्तम सेकंड हॅंड गाडी मिळेल आणि ती जास्त लाभेल. "

त्याने अंधेरीच्या पॉप्युलर कार बझारात जाऊन चौकशी केली. तिथे एका गृहस्थाची सहा महिने वापरलेली तीच गाडी विकायला होती. गाडीचे एकूण रनिंग केवळ अडीच हजार किलोमिटर झालेले होते. त्या माणसाला आखाती देशात नोकरी लागली म्हणून ती गाडी विकायची होती. उत्तम अवस्थेतली गाडी. फक्त अडीच हजार किलोमीटर चाललेली. आमच्या जातकाला दीड लाख रुपये स्वस्तात ती गाडी मिळत होती. दुपारी त्याचा पॉप्युलर कार बाझार मधून फोन आला. "पंत, असं असं आहे. काय करू?"

आम्ही त्याला सांगितले की, " तुझी गाडी तिथे उभी आहे, ती घे. उगाच वणवण करत बसू नको. "

त्याला काळा रंग लाभदायक होता. बरोब्बर त्याच रंगाची गाडी समोर उभी. तो सौदा त्याने केला. गाडी उत्तम लाभली. ज्योतिषशास्त्राच्या मार्गदर्शनाने दीड लाख रूपये वाचले.

आम्ही त्याला सांगितले की , " या फायद्याच्या एक टक्का रक्कम आमची फी म्हणून बॅंकेत जमा कर. "

संध्याकाळी पेढ्यांचा बॉक्स आणि पंधराशे एक रूपये दक्षिणा घेऊन तो आला. असो.

शनी जर चतुर्थात असेल किंवा चतुर्थेश शनीच्या नक्षत्रात असेल तर या लोकांना जुन्या गोष्टी फायद्यात मिळतात.

शेवटचा मुद्दा, घर कुणी घेऊ नये?

ज्यांचा महादशास्वामी आणि नवमांश चतुर्थेश तृतीयस्थानाचा एकमेव कार्येश असेल त्यांनी स्वत:च्या नावे घर किंवा वाहन घेण्याच्या भानगडीत पडू नये. ते कधीच लाभत नाही.

तूर्तास एवढेच.

आपला,
(मार्गदर्शक) धोंडोपंत

Wednesday, September 10, 2008

विवाहयोग आहे का? कधी?




लोकहो,

वर दिलेली कुंडली एका मुलीची आहे जिच्या विवाहाचा प्रश्न अजून निकालात निघालेला नाही. अनेक वर्षे विवाहाची वाट पाहून आणि वेगवेगळ्या ज्योतिषांकडून विवाह ठरण्याच्या वेगवेगळ्या तारखा घेऊन थकलेल्या या तरूणीची कुंडली पाहूया.

आम्हाला अनेक वाचकांनी अशी विनंती केली होती की, तुम्ही कृष्णमूर्ती पद्धतीतील भावचलितापेक्षा लग्न कुंडलीवरून प्रश्न सोडवलेत तर ती कुंडली आम्हाला जास्त चांगली समजेल. त्यांचे म्हणणे खरे आहे. याची दोन कारणे आहेत. एकतर कृष्णमूर्ती पद्धत अत्यंत अचूक असूनही अजून सर्वदूर पसरलेली नाही. भारतातील बहुसंख्य भागात पारंपारिक पद्धतीनेच कुंडली पाहिली जाते. अपवाद तामिळनाडू आणि काही अंशी महाराष्ट्र. दुसरी गोष्ट म्हणजे भावचलित कुंडली हा अत्यंत किचकट प्रकार आहे हे कुणीही मान्य करेल.
पण भावचलित कुंडलीच्या फाफटपसार्‍यात न अडकता केवळ नवमांश व जन्मकुंडलीवरून ग्रहांचे कार्येशत्व काढून अत्यंत अचूक निदान करता येते. या पद्धतीत भावचलीत बनविण्याचा वेळ आणि त्रास दोन्ही वाचतात.

वर जन्मलग्न कुंडली आणि नवमांश कुंडली दिलेली आहे.

विवाहाचा विचार करतांना, भाव नवमांश कुंडलीतील सप्तमेश हा जर जन्मलग्न कुंडलीत २/७/११ यापैकी भावांचा जर कार्येश असेल तर विवाह होईल.

या कुंडलीतील नवमांश सप्तमेश चंद्र आहे. चंद्र जन्मकुंडलीत पंचमात असून चंद्राची रास षष्ठात आहे. चंद्र राहुच्या नक्षत्रात असून राहू स्वत: षष्ठात आहे. राहु बुधाच्या नक्षत्रात असून बुध नवमात व बुधाच्या राशी अष्टम व पंचमात आहेत. राहू चंद्राच्या राशीत असून चंद्राचे कार्येशत्व वर लिहिले आहेच.

चंद्र - ५/६ नक्षत्रस्वामी राहु ६/- राहुचा नक्षत्रस्वामी बुध ९/८, ५ ( चंद्राची दृष्टी - ११)

राहु राशीस्वामी चंद्र - कार्येशत्व वरीलप्रमाणे

वरील नवमांश सप्तमेशाचे कार्येशत्व पाहिले तर विवाहासाठी आवश्यक असलेल्या स्थानांपैकी तो केवळ ११ व्या स्थानाचा दृष्टीयोगाने कार्येश आहे. तसेच तो विवाहाला विरोध करणार्‍या ६ आणि ८ या दोन स्थानांचा बलवान कार्येश आहे. ६, ८, १२ ही वैवाहिक सौख्य बिघडवणारी स्थाने आहेत. इथे चंद्र राहुच्या सबमध्ये आहे. तसेच वैवाहिक सौख्याचा कारक ग्रह शुक्र हा देखील राहुच्याच नक्षत्रात आहे. ही गोष्ट बरेच काही सांगते. जेव्हा एखादा ग्रह राहुच्या नक्षत्रात पडतो किंवा राहुयुक्त असतो तेव्हा त्या ग्रहाच्या कारकत्वात राहु न्यूनता आणतो.

सर्वात वर कृष्णमूर्तीपद्धतीप्रमाणे बनविलेल्या या कुंडलीचा विचार केल्यास सप्तमस्थानाचा सब बुध आहे. भावचलीतात बुध स्वत: अष्टमात असून बुधाच्या राशी ८ व ५ या भावारंभी आहेत. बुध राहूच्या नक्षत्रात असून राहू षष्ठात आहे. राहू बुधाच्याच नक्षत्रात असून तो चंद्राच्या कर्क राशीत आहे व चंद्र चतुर्थात असून त्याची रास षष्ठ भावारंभी आहे.

बुधाचे कार्येशत्व असे येईल.

बुध - ८ /८, ५ नक्षत्रस्वामी राहू ६/- राहुचा नक्षत्रस्वामी बुध - ८/ ८, ५ (बुधाची दृष्टी(जन्मकुंडलीनुसार) - ३)

राहु राशीस्वामी चंद्र - ४/ ६ नक्षत्रस्वामी - राहु ६/- (चंद्राची दृष्टी - ११)
कृष्णमूर्ती पद्धतीनुसार सप्तमाचा सबलॉर्ड बुध हा मंगळाच्या सब मध्ये आहे. मंगळाचे कार्येशत्व पहा. तेवढी गोष्ट या कुंडलीबद्दल बोलायला पुरेशी आहे. त्यामुळे महादशास्वामींचे कार्येशत्व पाहण्याचीही जरूर नाही.
दोन्ही पद्धतींनी कुंडली सोडवून दिलेली आहे. आता या मुलीला वैवाहिक सौख्य आहे की नाही हे तुम्हीच ठरवा.

आपला,
(तौलनिक) धोंडोपंत

Tuesday, September 9, 2008

विवाहास विलंब- काही प्रमुख योग

लोकहो,

विवाह ही साधारण प्रत्येकाच्या आयुष्यात घडणारी घटना. विवाह होणे म्हणजे काही achievement म्हणता येत नाही. पण तरीही अनेकांच्या आयुष्यात या सर्वसाधारण घटनेमुळेही मोठे प्रश्नचिन्ह उभे राहते. अनेकदा शिक्षण, रूप, आर्थिक स्थिती सर्व काही व्यवस्थित असूनही विवाह जुळत नाही.

"दिसामागुनी दिवस चालले, ऋतू मागुनी ऋतू
जीवलगा कधी रे येशील तू ?"

अशी वाक्ये आळवत अनेकांना तारूण्य एकटेपणाने घालवावे लागते. ज्यांच्या कुंडलीत विवाहाचा योग नसतो त्यांची गोष्ट वेगळी. पण कुंडलीत विवाह होण्याचे संकेत मिळूनही पालकांना चिंता वाटावी इतक्या वयापर्यंत जेव्हा विवाह लांबतो तेव्हा त्यामागे काय कारणे आहेत याचा विचार सुरू होतो.

त्यावर उपाययोजना काय करता येईल म्हणून कुडमुड्या ज्योतिषांचे उंबरठे झिजवायला सुरूवात होते.

अनेकदा तशा ज्योतिषांकडून, जे फक्त स्वत:च्या बायकोमुलांच्या पत्रिका बघून स्वत:ला कृष्णमूर्ती समजायला लागलेले असतात, अशा लोकांकडून नको ते मार्गदर्शन केले जाते. नको त्या पूजा आणि यज्ञ सुचवले जातात.

स्वत:ला फार विद्वान समजणारे काही जण नारायण नागबळी करण्याचेही सल्ले देतात. त्यासाठी त्र्यंबकेश्वरच्या वार्‍या करायला लावतात. काही जण ग्रहांच्या शांती करायला लावतात. काहींना तर या लोकांचा विवाह न होण्यात वास्तूदोष आढळतो, असेही येडझवे आहेत. काही जण रत्ने वापरायला देतात. एक ना अनेक प्रकारे विवाह न होणारी व्यक्ती त्यांचे Profit Centre बनत असते.

गुरूचे गोचर भ्रमण बघून सप्तमावर गुरूची दृष्टी असेल तो काळ विवाहाचा आहे असही काही जणांकडून सांगितले जाते. पण अनुभव असा येतो की, गुरू वर्षभर त्या स्थानात ठाण मांडून बसलेला असतो त्याची सप्तमावर दृष्टी असते तरी सुद्धा विवाहाचा योग येत नाही.

सध्याच्या समाजरचनेनुसार आपल्या समाजात २५ वर्षांपर्यंत विवाह न होणे हे काही गांभीर्याने घेण्याची गोष्ट नव्हे. पण त्यानंतरही तीन तीन चार चार वर्षे जेव्हा विवाह न होता जातात तेव्हा एक फ्रस्ट्रेशन त्या लोकांना यायला लागते.

विवाहास विलंब होण्याचे प्रमुख तीन योग आहेत. यापैकी कुठलाही एक योग जन्मकुंडलीत असेल तर त्या व्यक्तीचा विवाह उशीरा होतो. ते योग असे:-

१) सप्तमस्थानात शनी असता किंवा सप्तमावर शनीची दृष्टी असता विवाह उशीरा होतो.

२) शनीची चंद्रावर दृष्टी असता किंवा चंद्र शनीच्या युतीत असता विवाह उशीरा होतो.

३) कुंडलीत सप्तम किंवा अष्टम स्थानात मंगळ असता विवाह उशीरा होतो. काहीवेळा मुलींच्या कुंडलीत पंचमातला मंगळही विवाहास विलंब करतो.

वर उल्लेख केलेले नियम हे उशीरा विवाह होण्याचे मुख्य नियम आहेत. यापैकी एखादा ग्रहयोग जरी कुंडलीत असेल तरी तो विवाहास उशीर लावतो.

याशिवाय इतरही काही योगात विवाह उशीरा होतो. हे योग गौण आहेत. त्यातील काही प्रमुख योग असे.

१) सप्तमेशावर शनीची दृष्टी असेल तर

२) विवाहाचा कारक ग्रह शुक्र जर नीच राशीत म्हणजे कन्या राशीत असेल तर

३) सप्तमस्थानात शनीची रास असेल तर. ( हा योग फक्त कर्क आणि सिंह लग्नाला येऊ शकतो.)

या नियमांना अपवाद असा आहे की समजा सप्तमात शनी, मंगळ किंवा कन्येचा शुक्र असेल आणि विवाहाच्या वयात त्याच ग्रहाची महादशा सुरू असेल किंवा सुरू होणार असेल तर विवाह उशीरा होण्याची शक्यता नसते. कारण महादशास्वामी स्वत: सप्तमाचा कार्येश होतो.

जाता जाता एका महत्वाचे प्रश्नाचे उत्तर देऊन जातो. अनेक लोक आम्हाला विचारतात,

"पंत, माझ्या कुंडलीत प्रेमविवाहाचा योग आहे का?"

हा प्रश्न हल्ली बहुतेक तरूण तरूणी विचारतातच. त्यांच्यासाठी प्रेमविवाहाचा नियम सांगतो जो त्यांना त्यांच्या साध्या कुंड्लीवरूनही बघता येईल. त्यासाठी कृष्णमूर्ती पद्धतीची कुंडली असण्याची काहीही आवश्यकता नाही. भाव-नवमांश पद्धतीनुसार आपल्याकडील केवळ निरयन जन्मलग्नकुंडली आणि त्यासोबत असलेली नवमांश कुंडली यावरून आपला प्रेमविवाह होऊ शकेल की नाही याची अचूक आणि स्पष्ट कल्पना प्रत्येकाला येऊ शकेल. भाव- नवमांश पद्धतीत प्रेमविवाहाचा नियम कृष्णमूर्ती पद्धतीप्रमाणेच आहे. तो असा:-

जर नवमांश कुंडलीतील पंचमेश ( कृष्णमूर्ती पद्धतीनुसार पंचमाचा सबलॉर्ड) हा जन्मलग्नकुंडलीत सप्तमस्थानाचा कार्येश असेल आणि जन्मलग्न कुंडलीतील शुक्राचा मंगळ, राहू, हर्षल किंवा नेपच्यून यापैकी कोणत्याही एका ग्रहाशी किंवा एकाहून जास्त ग्रहांशी संबंध प्रस्थापित होत असेल तरच त्या व्यक्तीचा प्रेमविवाह होतो. येथे नवमांश पंचमेश विवाहाच्या २/७/११ पैकी ७ व्या स्थानाचा बलवान कार्येश असायला हवा. नुसता २ किंवा ११ चा कार्येश असून उपयोग नाही.

इच्छुकांनी आपल्याजवळ असलेल्या कुंडल्यात हा योग आहे का? हे पडताळून पहावे आणि आवडत्या व्यक्तीला मागणी घालावी. काल गुरू सुद्धा मार्गी लागलेला आहे. त्यामुळे आता होऊन जाऊ द्या जोरात. यावर्षी बार उडवा मात्र आम्हाला आमंत्रण पाठवा म्हणजे झाले.

आपला,
(वर्‍हाडी) धोंडोपंत