दिनांक २४ ऑक्टोबर २००८ ची सकाळ. एका गुणमेलनाचे काम नुकतेच उरकले होते. तेवढ्यात आमचे रत्नागिरीचे स्नेही श्री. जयंतराव उपाध्ये जे नोकरीनिमित्त मुंबईत असतात, त्यांचा दूरध्वनी आला.
"धोंड्याऽऽऽ रान्डेच्या, जिवंत आहेस की खपलास?"
"आता फोनवर बोलतोय म्हणजे अजून जिवंत आहे म्हणायचं. तू काय इतका पेटला आहेस?"
"अरे मला अमेरिकेची संधी आहे की नाही हे जरा कुंडली मांडून बघ पाहू. तिच्याऽऽऽआयला दीड महिना झाला मी लटकलोय. माझ्या ऑफिसमधले लोक पुढे गेलेत. मलाही संधी होती. पण अजून आमचं काही होत नाहीये. तर मी अमेरिकेत जाईन की इथेच मुंबईत धुणी धुवत राहीन ते जरा बघ लवकर."
जयंत उपाध्ये आणि इरसाल कोकणी शिव्या हे एक अतूट समीकरण आहे. उपाध्येचे शिव्यामृताने ओथंबलेले सर्व बोलणे जसे च्या तसे लिहिता येणे आम्हालाच काय कुणालाही शक्य नाही. मायावतीला सौंदर्यस्पर्धेत पारितोषिक मिळाले तर जेवढा धक्का आम्हाला बसेल तेवढाच हा उपाध्या दोन वाक्य शिव्यांशिवाय बोलला तर.
आम्ही त्याला सांगितले की, " ठीक आहे. बघू आपण प्रश्नकुंडली मांडून. तू एक नंबर दे ."
उपाध्याचे पूर्वीही काही प्रश्न आम्ही प्रश्नकुंडलीवरून सोडवले आहेत. त्यामुळे नंबर कसा द्यायचा वगैरे त्याला माहित आहे. त्याने काही वेळाचा अवधी घेतला आणि नंबर दिला ११२.
११२ नंबराची कृष्णमूर्ती पद्धतीची बनविलेली कुंडली वर दिली आहे. तसेच स्पष्ट भाव आणि महादशासुद्धा वर दिल्या आहेत.
नंबर ऐकताच आम्ही उपाध्याला म्हटले, " तू जाणार रे. या नंबरात १ आणि १२ आहे. एक म्हणजे स्वत: जातक आणि १२ हे परदेशगमनाचे स्थान. तू नक्की अमेरिकेत जाणार."
उपाध्ये म्हणजे एक नंबरचा पोचलेला खवट माणूस. तो म्हणाला, " धोंड्या तुझे हे नंबरावरून सांगण्याचे मटका ज्योतिष नको. रीतसर कुंडली मांडून काय ते सांग पाहू. दक्षिणा मिळेल तुला. त्याची काळजी करू नकोस. मी तुला फोन करतो १५/२० मिनिटांनी."
"ठीक आहे. कुंडली मांडतोच. पण उत्तर आधीच देतो आहे. "
वर दिलेल्या कुंडलीत सर्वात पहिली गोष्ट ही पहायची की जातकाने प्रश्न मनापासून विचारला आहे की नाही. चंद्र त्याबद्दल मार्गदर्शन करतो हे आता या ब्लॉगाच्या वाचकांना माहित आहेच. वरील भावचलीत कुंडलीत चंद्र व्ययस्थानात आहे आणि चंद्राची कर्क रास लाभस्थानात. व्ययस्थान हे परदेशगमनाचे प्रमुख स्थान आहे आणि लाभस्थान हे इच्छापूर्ती दाखवणारे स्थान आहे. म्हणजे जयंतराव उपाध्ये यांनी प्रश्न मनापासून विचारला आहे हे निश्चित झाले.
आता हा जया अमेरिकेत धुणी धुवायला जाईल की मुंबईत धुणी धुवत बसेल ते पाहू.
यासाठी व्ययस्थानाचा उपनक्षत्रस्वामी मार्गदर्शन करेल. व्ययस्थानाचा उपनक्षत्रस्वामी जर ३/९/१२ यापैकी स्थानांचा कार्येश असेल तर जयंतराव परदेशगमन करतील. तसेच तो जर वक्री ग्रहाच्या नक्षत्रात असेल तर जयंतरावांची परदेशगमनाची इच्छापूर्ती होणार नाही. जर तो स्वत: वक्री असेल तर तो मार्गी झाल्यावर जयंतराव परदेशगमन करतील. तसेच कुंडलीतील लाभस्थानाचा उपनक्षत्रस्वामी देखिल ३/९/१२ यापैकी स्थानांचा कार्येश असायला हवा.
वरील कुंडलीत व्ययस्थानाचा उपनक्षत्रस्वामी शनी आहे. शनी पूर्वाफाल्गुनी या शुक्राच्या नक्षत्रात आहे. प्रश्नवेळेस शुक्र वक्री नाही. तसेच शनीसुद्धा वक्री नाही.
शनी स्वत: व्ययात आहे तसेच तो पंचमेश आणि षष्ठेश आहे. शनी शुक्राच्या नक्षत्रात असून शुक्र तृतीयात आहे व तो धनेश आणि नवमेश आहे. शनीचे कार्येशत्व असे आहे.
शनी १२/ ५, ६ नक्षत्रस्वामी शुक्र ३/ २, ९
आपल्याला हव्या असलेल्या ३/९/१२ पैकी तीनही स्थानांचा शनी कार्येश आहे. म्हणजे हा टप्पा निर्विघ्नपणे पार पडला.
आता लाभस्थानाचा उपनक्षत्रस्वामी पाहू. लाभस्थानाचा उपनक्षत्रस्वामी शुक्रच आहे. शुक्र वर पाहिल्याप्रमाणे ३/२/९ या भावांचा कार्येश आहेच. तसेच शुक्र स्वत: शनीच्याच नक्षत्रात आहे म्हणजे तो १२/ ५, ६ या स्थानांचा बलवान कार्येश आहे.
त्यामुळे माननीय श्री. जयंतराव उपाध्ये सहवर्तमान अमेरिकेत धुणीभांडी करतील , मुंबईत नाही.
आता ते कधी अमेरिकेत जातील हे पहावे लागेल. त्यासाठी महादशा अंतर्दशा स्वामी मार्गदर्शन करतात.
या कुंडलीला सध्या केतूची महादशा सुरू आहे. केतूचे कार्येशत्व असे आहे
केतू ११/- नक्षत्रस्वामी बुध १/ १, १०
केतुचा राशीस्वामी चंद्र १२/११ नक्षत्रस्वामी पुन्हा केतु ११/- (उर्वरीत कार्येशत्व वरीलप्रमाणेच)
या ठिकाणी महादशास्वामी केतू हा ११ आणि १२ या दोन्ही आवश्यक स्थानांचा कार्येश आहे. म्हणजे केतू महादशेत परदेशगमन होईल.
या कुंडलीला केतूच्या महादशेत बुधाची अंतर्दशा सुरू आहे. बुधाचे कार्येशत्व जर अनुकूल असेल तर या बुधाच्या अंतर्दशेत उपाध्या उडेल.
बुध १/ १, १० नक्षत्रस्वामी चंद्र १२/११
म्हणजे बुध सुद्धा परदेशगमनाला अनुकूलताच दाखवतो आहे. सबब केतू महादशेत आणि बुधाच्या अंतर्दशेत परदेशगमन होईल.
आता ही बुधाची अंतर्दशा २४/१०/२००८ ते २५/०९/२००९ एवढी आहे. या कालावधीत उपाध्ये अमेरिकेत जाईल हे नक्की. पण नेमका कधी???????
त्यासाठी रूलिंग प्लॅनेट्स पहावे लागतील. प्रश्नवेळी म्हणजे दिनांक २४ ऑक्टोबर २००८ रोजी सकाळी ११ वाजून ०३ मिनिटांनी धनु लग्न सुरू होते. चंद्र रवीच्या सिंह राशीत केतूच्या मघा नक्षत्रात होता आणि त्या दिवशी वार शुक्रवार होता. म्हणजे रुलिंग प्लॅनेट्स असे लिहायला लागतील.
L- धनु -- गुरू
S- मघा -- केतू
R- सिंह- रवि
D- शुक्रवार- शुक्र
आता या रुलिंग प्लॅनेट्सवर घटना कधी घडेल???
तर लग्नस्वामीच्या राशीतून आणि उर्वरीत बलवान ग्रहांच्या नक्षत्रातून जेव्हा रवीचे भ्रमण होईल तेव्हा घटना घडेल. येथे लग्नस्वामी गुरू आहे. गुरूच्या धनु राशीत केतूचे मूळ नक्षत्र आहे. म्हणजे रवी जेव्हा मूळ नक्षत्रात जाईल तेव्हा उपाध्या विमानात असेल.
रवी १५ डिसेंबर रोजी धनुराशीत जातो. धनेत पहिलेच नक्षत्र मूळ आहे. रवी दिवसाला साधारण एक अंश जातो. म्हणजे तो १३ दिवस एका नक्षत्रात असतो. १५ डिसेंबर पासून १३ दिवस म्हणजे २७ डिसेंबर २००८ पर्यंत उपाध्ये अमेरिकेत जातील.
उपाध्याचा फोन आला तेव्हा त्याला तसे सांगितले. १५ डिसेंबर ते २७ डिसेंबर पर्यंत तू अमेरिकेत जाशील. उपाध्या आमचा जुना मेंबर. त्यामुळे त्याला माहित आहे की आम्ही सखोलपणे अभ्यास करूनच सांगतो. "पुढच्या तयारीला लागतो." एवढेच म्हणाला.
आज क्लास संपवून घरी आलो तेव्हा उपाध्याचा अमेरिकेतून फोन आला. नवीन वर्षाच्या शुभेच्छा द्यायला.
"धोंड्या, तू सांगितल्याप्रमाणे मी अमेरिकेतून बोलतोय. १९ डिसेंबरला निघालो मुंबईहून. दोन दिवस आधी तिकीट आलं. इथे आल्यावर सर्व जमवाजमव, धावपळ यात वेळ गेला. क्रिसमसच्या सुटीत अपार्टमेंटचं लफडं उरकलं. म्हटले तुझ्याशी जरा फुरसतीत बोलावं. म्हणून आत्ता फोन केला."
"छान. ऐकून आनंद झाला. दक्षिणा पाठवून द्या म्हणजे झाले. नाहीतर तुम्ही अमेरिकेत मजा माराल आणि आम्ही इथे फुकटात धुणी धुवत बसू. "
" अरे बसं काय भोसडीच्या धोंड्या. तुझे बॅंक स्टेटमेंट चेक कर. पैसे तुझ्या खात्यात पोहोचले आहेत."
बॅंक स्टेटमेंट पाहण्याऐवजी आम्ही कुतूहलापोटी १९ तारखेचा रवी पाहिला. आपल्या रुलिंग प्लॅनेटमध्ये तिसरा ग्रह रवीच आहे. त्या दिवशी रवी गुरूच्या धनु राशीत, केतूच्या मघा नक्षत्रात आणि रविच्या म्हणजे स्वत:च्या सब मध्ये होता. रुलिंगमध्ये रवी तृतीय ग्रह राशीस्वामी म्हणून आला आहे. तो स्वत:च्या उपनक्षत्रात असतांनाच घटना घडली.
रूलिंग प्लॅनेट्सच्या वापराचा शोध लावणार्या कृष्णमूर्ती गुरूजींना आमचा साष्टांग दंडवत.
आपला,
(नतमस्तक) धोंडोपंत
